DITINGKI ULAON ADAT

HATA MARALUS DOHOT HATA SIDOHONON

DITINGKI ULAON ADAT

     

1.      ACARA SEBELUM dan SESUDAH ANAK LAHIR

1. ULOS TONDI.

Pangaradeon.

(Dung ro sude angka na nipio (diundang) laho mangadopi ulaon laho pasahat ulos tondi manang ulos mula gabe, diatur parhata ni Paranak ma parhudul nasida. Hasuhuton Paranak hundul ma jadi jabu bona, uduran ni hula hula hundul di uluan ni jabu Hasuhutan masidompak-dompahan dohot uduran ni hula hula.)

1.1.            Hata huhuasi sian Suhut Paidua ni Paranak

    Mauliate ma parjolo tapasahat tu Tuhanta, ala marhite asi ni

    roha Na marhahipason hamu dohot uduranmuna ro madapothon hami.

    Hami pe hipas do didapot hamu. Mansai las situtu roha

    rohanami, Rajanami di hahororomuna on.Tung sude do hami na

    mardongan tubu, boru dohot dongan sahutanami marlas ni roha

    manjalo hahororomuna, Rajanami.

    Parjoloma hami marsomba dohot jari jari sampulu, pasampulu

    sada simajujung ma hami diangka na marhurang lobi. Nuaeng

    mamatampak borumuna. Tarsongon dia ma hinarohon ni raja i?

    Songon i ma jolo hatanami.

1.2.            Sintuhu ni haroro ni hula hula (Parboru).

    Horas ma jala gabe Raja ni Boru! Hami pe antong mandok mau

    Liate do tu Tuhanta, marhite pangiring-iringin-Na marhahi

    pason do hamu hudapot hami, suang songon i marhahipason

    do Borunami dohot Helanami.

   

    Sai asi ma roha ni Tuhanta, sai dilehon di hita saluhutna

    hahipason ni daging dohot tondi tu joloan ni ari on, boi

    hita marsitomuan di bagasan las ni roha.

    Taringot  ni sungkun-sungkunmuna i, Raja ni Boru, i ma

    taringot  ni sintuhu ni haroronami, silas ni roha do Raja

    ni Boru. Saminggu na salpu, ro do boa-boa silas ni roha sian

    suruan niHelanami tu hami,naung ditongos Tuhanta di nasida ,

    na taparsinta, i ma naung manggora pamuro di borunami.

    Hombar tusi ma haroronami Raja ni Boru, naeng pasahaton ulos

    tondi, manang ulos mula gabe ma hami tu Borunami dohot Hela

    name.

   

    Parhata ni Paranak

Mauliate ma jala malambok pusu ma hupasahat hami tu hamu Hula hulanami. Mansai balga jala las situtu rohanami, ai naeng pasahat ulos tondi, manang ulos mula gabe do hape hamu Rajanami tu parumaen dohot anaknami. Pasahat hamu ma sipasahatonmuna tu Borumuna dohot Helamuna. Botima Raja ni Hula hula.

(Parboru jonjong mandapothon boru dohot hele ne hudul di lage manang kursi laho pasahathon upa-upa, ulos tondi dohot boras sipir ni tondi)

1.3.    Hata Sidohonon ni Simatua- Boru Tingki Mangupa.

Di ho Inang, borungku dohot di hamu Amang Hela. Di son hupasahat hami upa-upa di hamu. Asa ro ma angka na tio dihamuna dua tu joloan ni ari on, jala tiur ma haroan na tapaima-ima. On ma Inang, boru hasian sipanganon sinoloman ni roham, na di pangido ho sian hami. (Somalna manuk na pinanggang, dengke ne niura, babi panggang,padar,manang lomang/itak gurgur) Tung songon i pe nuaeng dengke na

Hupasahat hami on, las ma rohamunamanganhon ( Dung i disulanghon inanta ma indahan rap dohot dengke tolu hali tu boruna i, dung i dipaimunahon ma muse aek sitio-tio, laos didok  ma. Alai nuaeng on ndang apala sai sulangi be dohot tangan manang sedok, cukup ma holan dipasahat dipiring i).

Asi ma rohani Tuhanta, sai tiur-tiur haroan na tapaima-iama. Horas ma na nipaima, horas ma hita na paimahon. Botima.

1.4.            Hata Sidohonon ni Simatua –Doli tingki pasahat Ulos Tondi.

Nunga di pasahat Inanta nangkin tu ho inang dohot hamu Hela upa-upamuna, i ma indahan na las dohot dengke  sitio-tio.

Di ho inang, boruku dohot hamu hela (Laos diuloshon ma ulos i sian siamun tu habirang ni na niulosan i, jala di urupi inata ma patipakhon asa unang hona tu simajujung nasida. Jala didok ma hatana) :

On ma  ulos tondi ni ho inang, boru hasian dohot dihamu Amang Hela. Ulos naung nirasian  do on,asa anggiat sarasi badan dohot tondimuna, asa marrongkap gabe marrongkap mamaora ma hamu mamangke ulos on. Ulos mula gabe ma di hamu ulos on, asa tangkas haroan  marharoanan siampu-ampuonmuna jala situak-tuakonmuna tu joloan ni ari on. Ulos tondi parmulaanmuna gabe ma on, mangulosi anak dohot boru ma on di hamu.

Sai tibu ma sorang haroan na tapaima-ima di ari na uli dia ari na denggan, so hariboriboan, asa marurat hamu tu toru, jala marbulung tu ginjang, mangerbang mangalaung tu lambung.

Songon hata ni umpasa :

    Togu  urat ni ri, togu do nang urat ni singkoru,

    Ulos tondi na hupasahat i, sai saur ma I di hamu, mang

    Ulosi anak dohot boru.

    Tubu  ma lata di toru ni Tarabunga,

    Sai tubu ma di hamu anak na marsangap dohot boru siboan

    tua.

    Sahat-sahat ni solu, sahat ma tu bontean,

    Sahat ma hamu leleng mangolu, sahat tu parhorasan pang  gabean.

(Dung i dibuat amanta i ma muse boras sipir ni tondi sian pinggan naung diparade hian, laos didok ma) :

    Pir do pongki, bahul-bahul pansalangon,

    Sai pir ma tondi, sai ro angka parsaulian

Pir ma tondi madingin, horas tondi matogu. (Parjolo ma dibahen amanta i tu simanjujungna ni helana, jala didok ma muse): Pir ma tondim boru hasian. Dao ma sahit sian badan dohot sahit ni pingkiran sian ho, asa tulus na taparsinta i jaloonmuna. Horas ma na ro, horas ma hita na paimahon. (Laos songon i ma muse dibahen tu helana). On ma boras pir liat-liat tu hamu Parboruannami. (Dung i dihorashon tolu hali tu ginjang jala didok ma) Horas, horas, horas ma hita saluhutna! ( Disalam  Parboru ma boruna, dohot helana,)

(Laos di pasahat ma muse dengke sitio-tio tu jolo ni suhut Paranak, boru dohot hela, jala didok ma) : Di hamu Lae,ito,Hela dohot borunami nang di hamu sude Parborunami. Di son rodo hami pasahathon dengke sitio-tio,asa sai tio ma parsaulian parhorasan di hita, tarlumobi di borunami na paima-iam haroan. Dengke simudur-udur, asa sai marudur-udur ma hamu tu dolok tu toruan, sai sahat saoloan. Dengke saur do on, asa sai saur ma hita leleng mangolu jala horas-horas. Dengke sahat ma on, asa sahat ma na uli na denggan, sai dipasahat Tuhanta ma pasu-pasu-Na tu hita. Tung songon on pe dengke on, las ma rohamuna manjalo. Botima. ( Masi jalangan, dung i hula hula/ simatua mulak tu hundulanna hian)

Parhata ni Parboru

On pe di hamu Raja ni Parboruannami! Nunga hupasahat hami be pangupaon dohot ulos tondi tu boru dohot helanami, mangihut pangupaon dohot ulos tondi tu boru dohot helanami, mangihut dengke sitio-tio dohot siudur-udur tu hamu Parboruannami . Saounari hupasahat hami ma partingkian tu hamu, asa uduti hamu.

Botima

Parhata ni Paranak

Gabe ma jala horas Raja ni hula hulanami! Nunga tung tangkas dipatuduhon hamu holong marboru i tu parumaennami. Asi ma roha ni Tuhanta , dipasaut ma sude angka tangiangmuna i.

Rajanami, Raja ni Hula hula. Andorang so arsipanganon hita, jolo hupasahat hami ma nian juhut na tabo, na marsaudara laho pasangahon hamu Rajanami. Botima.

Parhata ni Parboru

Na dengan angkup ni na uli Raja ni Boru. Nunga rade hami,

1.5.    Hata Sidohonon ni Simatua ni Parumaen ditingki pasahat

        tudu-tudu ni sipanganon.

(Paranak, anak dohot parumaen borhat mandapothon tu hula hula, laho pasahathon na margoar ni sipanganon, jala did ok ma hatana) Di hamu na huparsangapi hami, Hula hulanami. Tung so tarhasuhatan hami do songon dib alga ni holong na pinasahatmuna tu hami, lumobi ma tu parumaen dohot anaknami, manang boru dohot helamuna. Di son Raja ni Hula hula, hupasahat hami do tu hamu tudu tudu ni sipanganon, songon sombanami maradopon  hamu. Asa sai tudu tudu ni na uli na denggan ma on di ianakhonta, nang di hita sahulutna. Songon i pe nuaeng sipanganon na hupasahat hami on, las ma rohamuna manjalo. Botima.

(Paranak, hela, parumaen manjalang Hula hula, jala mulak muse tu hundulanna hian)

Parhata ni Paranak

Di hamu Amanta Raja dohot hamu Inang Soripada, parmanganonta system paresmanan do, masiantan di ibana be.

Di hamu Raja ni Hula hulanami. Ala laho marsipanganon ma hita, ise ma sian hita sibahen tangiang laho mangan.

Parhata ni Parboru

Mauliate  ma Raja ni Boru! Ninna rohanami, ala hamu do na parade sipanganon, sian hamu ma na mambahen tangiang laho mangan.

Parhata ni Paranak

Na denggan angkup ni na uli Rajanami. On pe Amanta Ama ni…

ma mambahen tangiangta laho marsipanganon hita. Botima.

( Sibahen tangiang, laos manghatahon hata ni sipanganon)

    Sititik marsigompa, golang pangarahutna,

    Songon dia pe sipanganon natupa, godang ma pinasuna.

Marjomuk ma hita!

(Di tingki na marsipanganon, boru ni Paranak paradehon pisau, sangkalan dohot piring kosong. Boru ni Parboru manjalo paralatan i, jala diseati ma aliang-aliang, ate-ate dohot butuha raja, dung i dibagihon tu hula hula dohot dongan sahuta nang dohot angka raja na ginokhon)

Perhata ni Parboru

(Dung sae marsipanganon parhata ni parboru manungkun partording ni tudu tudu ni sipanganonon) :

Di hamu Raja  ni Parboruonnami! Andorang so tampungka manghatai, nangkin nunga dipasahat hamu tudu tudu ni sipanganon on tu hami. Na manungkun ma hami tu hamu tarsongon dia ma partording ni on, Raja ni Boru. Songon i ma jolo sungkun-sungkunnami tu hamu. Botima.

Parhata ni Paranak

Olo ma tutu Raja ni Hula hula! Nunga tutu hupasahat  hami  tudu tudu ni sipanganon i tu hamu. Ninna  rohanami, surung –surungmuna do I, Rajanami! Botima.

Parhata ni Parboru

Molo songon i do pandokmuna, surung-surungnami tu hamu Raja ni Boru!. On pe di hamu borunami, asa pasipan hamu ma jolo tu ingananna, huhut pature hamu, asa lehon hamu anon tu unduranta na patut manjalo. Di hamu Raja ni Borunami! Songon dia ma muse udut niang hataionta Raja ni Boru. Hupasahat  hami ma tu hamu asa hamu ma na mangatur panghataionta. Botima.

1.6.            Hata sidohonon tingki pasahat pasituak na tonggi tu

        hula hula

Parhata ni Paranak

Gabe ma jala horas Raja no hula hula! Nunga tutu mardalan ulaonta dohot denggan. Eleknami  nian tu Raja i, andorang so dipasahat hamu hata sigabe, hata pasu-pasu rade ma hamu, asa ro hami pasahathon sipalas roha(batu ni sulang) dohot pasituak  na tonggi, asa sai ro angka na tonggi di hita saluhutna. Botima.

Parhata ni Parboru

Na dengan angkup ni na uli Amangboru! Pasahat hamu ma, nunga rade hami.

Parhata ni Paranak

On pe borhat ma anaknami dohot parumaennami pasahathon sipalasroha ni hula hulata dohot pasahathon pasituak na tonggi ( Anak dohot parumaen pasahathon amplop parjolo, i ma sipalas roha ( batu ni sulang ) tu natoras ni si parumaen. Dungi pe asa dilehon pasituak na tonggi tu sude rombongan Parboru).

On pe Rajanami, na mangido dope hami tu hamu, asa lehon hamu hata sigabe gabe dohot hata pasu-pasu tu hami saluhutna Parborumuna, tarlumobi tu anak dohot parumaennami.

1.7.    Hata sigabe gabe / pasu-pasu sian Hula hula.

Parhata ni Parboru

Gabe ma jala horas Raja ni Boru! Pashatonnami  do atong hata sigabe gabe, hata pasu-pasu dohot angka hata na uli tu hamu, Raja ni Boru!

( Didopakhon, dohot borunami, ninna roha nian, na pasahathon hata sigabe gabe, hata pasu-pasu dohot angka hata na uli hata na denggan, sude ma hita. Alai tung sad ape na mandok hata, naung sahat ma hita disi. Jadi tarsongon on ma nian. Songon hata ni umpasa na mandok :

    Sada silompa gadong, dua silompa ubi,

    Tung salak pen a mandok hata, sude ma mandok na uli.

Sada ma sian boru, sada sian hita na mardongan tubu, baru tu suhut Parboru Parjolo ma sian boru, dungi di uduti ma sahalak sian hiat na mardongan tubu, baru Raja ni Borunta. Beha rohanta. ( Rombongan Parboru mandok), “ Na denggan ni na uli”

1.7.1.  Hata sigabe gabe sian boru.

Muliate godang ma tapasahat tu Tuhanta, ai ala asi dohot holong ni roha-Na Boi hita pajupang di bagasta na marampang na marjual on di bagasan hahipason dohot las ni roha. Jala tarlumobi ma muse, mandok mauliate ma hita tu Tuhanta, dibasa-basahon do di hita haroan sipaimaon di maennami. Onpe do anakniba, malo ho manjaga huhut manganju roha ni maen i. Ai molo di tingki sisongon on, tarsi adong do parubahan ni roha. Jagas,unang mangangkat angka na borat ibana. Denggan urus panganona, asa sehat na dibagas botian, sehat nang maen on. Di hope maen, pos ma roham di haroan na tapaima on, adong do hami, tarlumobi Hula hulatana sai totong na mangalehon semangat dohot na manangianghon ho. Sai martamiang  ho tu Tuhanta,asa Ibana mangurupi ho, asa hipas sorang haroan na tapaima, horas hita na nidapotna. Songon hata ni umpasa ma dohonon:

    Sanjongkal urat ni ri, tolu jokal urat ni singkoru,

    Ulos mula gabe na ni pinasahat ni hula hulata i tu

    hamu,

    Saur ma i mangulosi anak dohot boru

Botima. Hatanami i hata sitambaan.

1.7.2.  Hata sigabe gabe sian dongan tubu

Totong ma hita mandok mauleate tu Tuhanta i. ai ndang tar  hasuhatan asi dohot holong ni roha-Na di hita. Di papungu do hita di ari na uli, ari na denggan on mar las ni roha manjalo sibasa-basa-Na, I ma haroan na tapaima-ima diborunta. On pe Boru hasian, las ma roham majalo sibasa-basa ns sian Tuhanta i. Songon di tangiang pasu-pasunami di tingki tarpasu-pasu hamu, asa tibu hamu di liliti andorana, nunga dapot i nuaneng, las maroham, las ma rohanta. Songon hata ni umpasa ma dohonon :

Tubu ma lata di toru ni bung-bung,

    Tubu ma di hamu anak na marsangap,

    Dohot boru na martua donganmuna saurmatua.

Ala ni i sotung uang do marsak roham, manang mabiar din a managam haroan on ho Inang. Pos roham Inang,boru hasian, antaadong do hami masi  manangianghon ho tu Tuhanta i, asa Ibana na mangurupi ho, dohot na mampargogoi ho di haroan na tapaima-ima i. Sorang Ibana so haribo-riboan. Horas na ro, horas na ni dapot. Di hamu pe Amang Hela, tongtong ma lehon hamu dorongan semangat tu Borunami on,asa pos rohana. Jala sabar hamu manganju Borunami, jala nengan urus hamu sipanganonna, asa sehat haroan na tapaima. Botima Hatangki hata sitambahaan.

1.7.3.  Hata sigabe gabe dohot pasu-pasu sian simatua ni anak

Tapuji ma Tuhanta, na mangalehon ari na uli, ari na denggan on, boi hita pajupang di bagasan hahipason dohot las ni roha. Lumobi muse, marlas ni roha hita, ala dilehon Tuhanta do sibasa-basa-Na, i ma haroan na tapaima-ima di borunta. Di silas ni rohanta i, Inang boru hasian, nunga hupasahat hami nangkin upa-upam di na managam haroan ho, i ma marhite indahan n alas dohot dengke sitio-tio nang dohot sipanganon sinoloman ni roham boru hasian, asa tio ma parhorasan, parsulian di ho boru hasian dohot dihelanami pasu-pasuon ni Tuhanta. Nunga hupasahat hami ulos tondi manang ulos mula gabe, sai mangulosi daging dohot tondimuna ma i, suang songon i nang haroan na tapaima-ima pasu-pasuon ni Tuhanta. Laos  nunga hupasahat hami tu hamu sude Parboruonnami dengke simudur-udur, asa sai marudur-udur hamu antong tu dolok tu toruan, jala sai masipaolo-oloan di bagas holong na sian Tuhanta i.

    Pege sangkarimpang, ansimun sada holbung

    Mangangkat rap tu ginjang,tu toru rap manimbung.

Dengke saur, dengke sahat, asa sahat ma na uli, sahat na denggan jala saur ma hita leleng mangolu sahat tu na saurmatua jala horas-horas. Songon hata ni natua-tua ma dohonon :

    Andor  handungka ma togu togu ni lombu

    Pengpeng saur matua ma hamu patogu-togu pahompu.

On pe Inang, boru hasian, pos ma roham, adong do hami hula hulam, dongan tubum, borum dohot angka dongan sahutam na laho mangaleho  semangat dohot tangiang tu Tuhanta mangurupi ho, Inang hasian. Sai na urupan-Na do ho di gogo dohot haipason. Horas haroan na laho sorang, horas hita na paimahon. Songon i ma hatanami tu hamu Raja ni Parboruon

nami.

    Sahat –sahat ni solu, sahat ma tu bontean,

    Sai leleng mahita mangolu sahat tu parhorasan Pangabean

Botima.

Parhata ni parboru

On pe di hamu Raja ni Borunami! Nunga be sude hami marliat-liat pasahat hata sigabe gabe dohot hata pasu-pasu na uli. Hupasahat hami ma tu hamu, asa ampuhamu Botima.

1.8.    Hata pangampuon sian Paranak

Parhata ni Paranak

Gabe ma jala horas Rajanami! Ampuonnami ma tutu hata sigabe gabe, hata pasu-pasu, i ma hata na uli hata na denggan na pinasahatmuna tu hami.

(Didompakhon tu horong ni Paranak). Di hita rombongan Paranak, na mangampu do hita di hita hata sigabe gabe dohot hata pasu-pasu na ni pasahat ni Raja ni Hula hulanta. Jadi ninna roha nian, parjolo ma hamu Boru, dung i donagn sahuta, laos diuduti na mardongan tubu, baru pe suhut Paranak, anak dohot parumaen. Sahalak ma songon utusan sian ganup horong, songon hata ni umpasa :

    Sada si lompa gadong, dua si lompa ubi

    Sahalak pe na mandok hata, sude ma hita dapotan uli

On pe hupasahat hami ma parjolo tu Borunami.

1.8.1.  Hata pangampuan sian Boru.

Mauleate ma tapasahat tu Tuhanta, ala marhite asi dohot holong ni rohana boi pajumpang hita di bagasan hahipason dohot lasniroha. Mauliate do dohononnami nang tu hamu raja ni hula hula ni hula hulanami, disiala haroromuna na pasahathon ulos tondi manang ulos mula gabe, nang dohot upa-upa marhite  indahan nalas dohot dengke sitio tio tu Nantulang na poso dohot Paramaannami. Sude hata sigabe gabe dohot hata pasu-pasu na pinasahat muna tu hami, tarlumobi tu Natulang na poso dohot Paramaannami, sai manjangkon ma pardagingon dohot partondion,tuak ma di abara, ,ampe di parsalimbubuan nasida pasu pasuon ni Tuhanta.

Ndang tarbalos hami uli basa na pinasahatmuna i tu hami, sai sian Tuhanta ma jalo hamu balosna marlipat ganda. Songon i ma jolo pangampuon sian hami Boru.Botima

1.8.2.  Hata pangampuon sian Dongan Sahuta

Sai totong do mandok mauleate hita tu Tuhanta Parasi roha bolon i, ai di dongani do hia di ulaonta silas ni roha dijabu na marampang na marjual on. Mauliate  do dohononnami tuhamu hasuhutonnami, na manggokhon huhut manjou hami dongan sahutamuna asa dohot hami mangadopi haroro ni Hula hulata na pasahat  ulos tondi dohot upa upa ni Inanta ni paima haroroan dohot Amanta i. Las ni roha ni hasuhuton, laos tong dohot hami dongan sahutamuna marlas ni roha. Songon hata ni umpasa :

    Poltak  bulan tula, si raja manggule,

    Molo marlas ni roha hasuhuton, dongan sahuta pe dohot   mahulae.

On pe sidohononnami, din a mangampu hata ni Hula hulata, sai manjangkon ma pardagingon dohot partondion di hata pasu-pasu dohot hata sigabe gabe na pinasahatmuna tu hami,Tarlumobi tu inanta na paima haroroan di pasu-pasu Tuhanta.Botima

1.8.3.  Hata pangampuon sian Dongan Tubu.

Tapuji ma Tuhanta na sangapna marmulia i. marhite asi dohot holong ni roha-Na dilehon do hahipason ni daging dohot tondi di parmunguata di silas ni roha sadari on, di na ro hamu Hula hulanami pasahat ulos tondi tu parumaennami, Jala mauliate ma hupasahat hami tu hamu Hula hulanami, di uli basamuna na pasahathon ulos tondi, manang na didok ulos mula gabe. Suang songon i do nang dohot angka hata pasu-pasu, hata tangiang nang hata poda na dipasahat hamu tu hami,tarlumobi tu parumaennami dohot anaknami. Sai tuak ma i di abara, ampe di parsalimbubuan nasida. Sai manjokon ma pardagingon dohot partondion ni parumaennami dohot anaknami. Uli basamuna i Rajanami, ndang tarbalos hami i, sai sian Tuhanta ma jalo hamu balosna marlopit ganda. Botima.

1.8.4.  Hata pangampuon sian suhut Paranak

Tapuji ma Goar ni Tuhanta Parsi roha bolon i. Marhite na didonganiasi ni roha ni Tuhanta do asa denggan marture ulaonta silas ni roha sadari on. Mauliate ma hupasahat hami tu hamu Amanta Raja dohot  Inanta  Soripada, dongan sabutuhanami, boru/berenami, dohot dongan sahutanami, di haradeon ni rohamuna rampak hamu dohot inanta soripada mangadopi ulaon silas ni rohanta sadari on. Molo tung hurang pe panjaloan namidi hamu, marpanganju ma hamu di hami. Tangkas do huboto hami, alani pangurupionmuna do asa saut ulaonta on. On pe mauliate ma di hamu Amang Raja dohot hamu Soripada.

Jala mandok mauliate do hami tu hamu Raja ni Hula hulanami, di uli basamuna na pashathon ulos tondi tu parumaen dohot anaknami, suang songon i dohot indahan n alas dohot dengke upa-upa,nang angka hata pasu-pasu dohot hata sigabe gabe tu mami, tarlumobi tu parumaennami dohot anaknami. Sai asi ma roha ni Tuhanta, sai manjangkon ma pardagingon dohot partondionnami di angka hata na uli hata na denggan na pnasahatmuna tu hami. Songon hata ni natua-tua ma dohononnami :

    Naung sapulupitu, jumadi sampulu alu

    Hata pasu-pasumuna i, sai huampu hami i di tonga jabu.

Uli basamuna i Rajanami, ndang tarbalos nami i, sai sian Tuhanta ma jalo hamu balosna marlipat ganda Di tangiangnami nami, sai dilehon Tuhanta ma di hamu hahipason dohot gajang ni umur. Botima

1.8.5.  Hata mangampu sian anak/parumaen.

Mauliate ma hupasahat hami tu Tuhanta, na mangalehon hahipason di hita. Suang songon i mandok mauliate do hami tu hamu Hula hulanami, naung pasahathon upa-upa marhite indahan las dohot dengke sitio-tio, ulos tondi, manang ulos mula gabe, nang ampe di salimbubunami. Hata ni situa-tua ma dohonon :

    Turtu ma ninna anduhur, tio ma ninna lote,

    Hata pasu-pasumuna i Rajanami,sai unang muba,unang mose

Uli basamuna Rajanami, ndang tarbalos nami i, sai sian Tuhanta ma jalo hamu balosna marlipat ganda. Botima

Parhata ni paranak

Di hamu Raja ni hula hulanami! Nunga ris be hami mangampu hata sigabe gabe, hata pasu-pasu na pinasahatmuna tu hami. Songon hata ni umbasa ma dohononnami :

    Naung sampulu pitu, jumadi sampulu alu,

    Sude hata na uli na pinasahat muna Rajanami,

    Huampu hami ma di tonga jabu.

Di hata panimpulion ni ulaonta sadarion, dohonon ma hata ni umpasa ni situa-tua :

    Binanga ni Bangkara, tu binongkak ni Tarabunga,

    Di balian ndang marmara, di hut ape ndang mahua.

    Tu sanggar ma amporik, tu lumbang ma satua,

    Sinur ma na pinahan, gabe mana n uli

    Sahat-sahat ni solu, sai sahat tu bontean,

Sai leleng ma hita mangolu, sahat tu parhorasan tu panggabean.

Pangidoannami Rajanami, sian hamu Hula hula i ma mambahen tangiang panutup di ulaonta sadari on. Botima

Parhata ni Parboru

Gabe  jala horas Raja ni Boru!(Didompakhon tu amanta sintua) On pe Amang Sintua, bahen ma endenta, jala laos tutup ma dohot tangiang. Botima.

    (Dung saematangiang, marhhehe na uli, masijalangan, jala di tingki i ma dilehon jambar na dibungkusi nangkin